#GoazenLagunok! Fedibertsoa (eta Mastodon) sustatzeko kanpaina kolektiboa da.
Ekonomia Sozial Eraldatzaileari eta aktibismo digitalari lotutako hainbat eragilek bultzatu dugu eta pertsona eta eragile gehiago batu dira bidean. Hau da martxan jarri berri dugun webgunea: Goazenlagunok.eus
* Webgunea lantzen ari gara oraindik, akatsik badago lasai, abisatu, edo laster konponduta ikusiko duzu.
Batzeko lau modu daude:
- Talde edo norbanako gisa atxikitzea. Bete formulario hau, eta zure izena eta erabiltzailea gehituko ditugu jarraitzeko gomendatutakoen zerrendan: https://erabili.liberaforms.org/goazen-lagunok-fedibertsora
- Urtarrilaren 20ko ekintza kolektiboan parte hartzea. Norberaren sare sozial eta kanal guztietan #GoazenLagunok! kanpainan parte hartzen dugula idatziko dugu, Fedibertsoan (eta Mastodonen) gaudela esateko.
- Eman izena posta-zerrendan, beste ekintza eta baliabide batzuen berri izateko (esteka webgunean duzu).
- Zabaldu mezu hau zure harreman sareetan, eta erabili #GoazenLagunok, #DenokFedibertsora traolak zabalpenerako, eta #fedibertsoaulertzen eta #aurkezpena ongi etorriak bideratzeko.
Goazen lagunok, amets betean, sare libre bila denok bateraaaa 🙂
Egun batzuk dira ‘Goazen lagunok’ kanpaina abiatu genuela eta hainbat gauza kontatu nahi dizkizuegu:
– 120 atxikimendutik gora lortu ditugu egunotan.
– Hizkuntza guztietan dugu prest webgunea.
– Astebete baino ez da falta ekintza kolektiborako!
Zertan datza urtarrilaren 20ko ekintza?
Eskura ditugun sare sozial eta kanal digital guztietan Fedibertsoan eta Mastodonen elkartzeko gonbidapena argitaratuko dugu. Pertsona eta kolektibo batzuek ere aprobetxatuko dute egun hori X edo Meta uzteko, baina hori hautazkoa da, ulertzen dugulako zirkunstantziak anitzak direla, mezu komuna hau da: Fedibertsoan gaude, goazen lagunok!
Egun horretan zuen sare eta kanaletan partekatzeko edukiak prestatzera gonbidatzen zaituztegu guztiok. Urtarrilaren 20a aukeratu dugu Trump presidente izendatuko duten eguna delako, beraz, erraza izango da aldaketa hau azaltzeko arrazoiak azaltzea… Gogoratu lurreratzea errazteko webgunea daukagula, gonbidatu nahi duzuen jende guztiarekin partekatu dezakezue: https://goazenlagunok.eus/
Edozein galdera edo proposamen egiteko, fedibertsoan @fedibertsoa@mastodon.eus edo emailean goazen@fedibertsoa.eus helbideetan gaude.
